Mat 28 | BOJ | STEP | Yori bati koboonaqa nebeonaq nobqolo ambru Maria Makdala qure qaji naŋgi Maria bei wo tigelosib Yesus aqa sub unqajqa gileb.

Matthew 28

Yesus a olo subq na tigelej

1 Yori bati koboonaqa nebeonaq nobqolo ambru Maria Makdala qure qaji naŋgi Maria bei wo tigelosib Yesus aqa sub unqajqa gileb. 2 Naŋgi gileqnabqa Tamo Koba Qotei aqa laŋ aŋgro bei laŋ goge dena aisiqa meniŋ kobaquja sub me getentesoqnej qaji di belbeltosiq qalaq di atsiqa meniŋ quraq di awesoqnej. Awesonaqa mimiŋ kobaquja dej. 3 Laŋ aŋgro di aqa ulatamu kola minjal bul tulaŋ minjalo. Aqa gara laŋbi bul tulaŋ qat. 4 Onaqa qaja tamo naŋgi sub me taqatesoqneb qaji naŋgi na laŋ aŋgro di unsibqa naŋgi tulaŋ ulaugetosib gindagindaŋosib mandamq di ululoŋosib tamo moreŋo bul tindaŋesoqneb.

5 Ariya uŋa aiyel naŋgi gilsib subq di brantosib laŋ aŋgro di itonabqa a na minjrej, “Niŋgi ulaaib. E qalie, niŋgi Yesus ŋamburbasq di qameb qaji a qa ŋameqnub. 6 A endi sosai. A subq na tigelqo. Agi a nami niŋgi endegsi merŋgej, ‘E subq na tigelqai.’ Deqa niŋgi aiyel bosib sub miligi uniye. A ŋeioteb qaji lume agi unu. 7 Niŋgi unsibqa olo puluosib gurgur ti aisib Yesus aqa aŋgro naŋgi endegsib minjriye, ‘Yesus a subq na tigelqo. Tigelosiq niŋgi qa namoosiq Galili sawaq gilqo. Niŋgi dego Galili sawaq gilsib dia a itqab.’ O uŋa aiyel, e niŋgi anjam di merŋgwa bonum.” Laŋ aŋgro na uŋa aiyel di naŋgi degsi minjrej.

8 Onaqa uŋa aiyel naŋgi di tulaŋ ulaugeteb. Osib naŋgi olo areboleboleinjrej. Deqa naŋgi subq dena olo puluosib gurgur ti aisib laŋ aŋgro na anjam minjrej qaji di Yesus aqa aŋgro naŋgi minjrqajqa aieb. 9 Naŋgi aiyel aieqnabqa gamq dia Yesus a segi naŋgi aiyel turosiqa minjrej, “O kaiye.” Degsi minjrnaqa naŋgi aiyel aqa areq bosibqa aqa siŋga ojsib a biŋiyeb. 10 Onaqa Yesus na minjrej, “Niŋgi ulaaib. Niŋgi aisib ijo was naŋgi endegsib minjriye, ‘Niŋgi Galili sawaq giliye. Gilsib dia niŋgi Yesus itqab.’”

Qaja tamo naŋgo gisaŋ anjam

11 Ariya uŋa aiyel aieqnabqa qaja tamo sub taqatesoqneb qaji naŋgi tigelosib qure miligiq aieb. Aisib kumbra kalil subq di brantonaq uneb qaji di atra tamo kokba naŋgi sainjreb. 12 Sainjrnab qusibqa Juda gate kokba kalil naŋgi metnjrnab bosib koroeb. Koroosib qaja tamo naŋgi di silali kobaquja enjrsib anjam endegsib keretosib minjreb, 13 “Niŋgi na tamo uŋgasari naŋgi anjam endegsib minjroqniye, ‘Iga sub taqatsim ŋereŋesonamqa Yesus aqa aŋgro naŋgi qolo bosib subq dena Yesus aqa jejamu bajiŋosib jaraieb.’ Niŋgi na anjam degsib tamo uŋgasari naŋgi minjroqniye. 14 Pailat a nuŋgo anjam di qusim niŋgi qa ŋiriŋamqa iga na aqa are olo latetosim anjam gereiynamqa a niŋgi gulube bei eŋgwasai.” 15 Onaqa qaja tamo naŋgi silali di osib atra tamo kokba naŋgo anjam di dauryosib Yesus aqa aŋgro naŋgi na aqa jejamu subq dena bajiŋeb anjam di mare mare laqnabqa anjam di tulaŋ kobaonaqa Juda tamo uŋgasari tulaŋ gargekoba naŋgi queleŋosib maroqneb agi bini maroqnsib unub.

Yesus na aqa aŋgro naŋgi aqa anjam osib tamo uŋgasari naŋgi minjroqnsib laqajqa deqa wau enjrej

16 Onaqa Yesus aqa aŋgro 11-pela naŋgi Galili sawaq gilsib mana bei Yesus a nami naŋgi deq oqwajqa minjrej qaji deq oqeb. 17 Oqsib dia Yesus itosib a biŋiyosib aqa ñam soqteb. Ariya naŋgi qudei areqalo aiyeltosib mareb, “Di Yesus bole kio sai kio?” 18 Ariya Yesus a naŋgo areq gilsiqa minjrej, “E na mandam ti laŋ ti taqatqajqa deqa ijo Abu na siŋgila kalil ijo baŋq di atqo. 19 Deqa niŋgi walwelosib sawa sawa kalil keretoqnsibqa tamo uŋgasari kalil naŋgi ijo anjam minjroqnsib laqniye. Minjroqnibqa naŋgi ijo anjam quoqnsib dauryoqnsibqa ijo segi aŋgro bole sqab. Deqa niŋgi na ijo Abu aqa ñam na ti e Qotei aqa Ŋiri ijo segi ñam na ti Qotei aqa Mondor Bole aqa ñam na ti naŋgi yansnjroqniye. 20 O ijo aŋgro, anjam kalil e nami niŋgi merŋgoqnem qaji di niŋgi walwelosib tamo uŋgasari naŋgi minjroqnsib laqniye. Laqnibqa naŋgi quoqnsib dauryoqnqab. Niŋgi segi sosib wauoqnqab edegaib. E bati gaigai niŋgi koba na wauoqnsiy sqai. Degsim soqnim soqnim diŋo bati brantqas.”